|
Nyheit:
Du rekk framleis å bestille den nye årboka vår før jul!
Omslagsfoto: Randi Larsen
For 6. gong har medlemmer og sympatisørar rundt Østfold Mållag
mobilisert krefter og er nå ute med årbok før jul. Boka dekker åra 2010
og 2011 og har artiklar om mange ulike emne – med språk som ein
fellesnemnar.
Her er artiklar om stadnamn, folketru og lydfenomen i
Østfold-dialektane saman med innlegg som argumenterer for språkleg
mangfald.
Bestill boka enkelt og greitt med ein e-post til leiaren av laget:
magne.aasbrenn(a)gmail.com eller ved telefon/sms til
97970065.
Pris kr. 100,- fritt levert.
Av
innhaldet:
Lektor Edvard Mogstad ved Glemmen
vidaregåande skole tar for seg det mystiske samantreffet mellom
tre stadnamn i Tune og stadnamn i det gammalnorske Eddakvadet Grimnismål.
I kvadet finn ein Ydalir, Alfheim og Valaskjalf, noko som tilsvarar
Yven, Alvim og Valaskjold i nåverande Sarpsborg kommune. Korleis kan
dette ha seg?
To kjende namn i Fredrikstads musikkliv, Wenche Mortensen og
Jon Buer, skriv om "Himmelbrev", som er eit nytt syngespel
som skal bli framført i fleire Østfold-kyrkjer i 2012. Det er basert på
tekstar i kyrkjeboka i Rømskog om at ei 16 år gammal jente opplevde
overnaturlege fenomen i 1721.
Kjetil Aasen, som voks opp i
Fredrikstad og nå er konsulent i Språkrådet, skriv om ulike
tradisjonar i norsk målføregransking og spesielt om Reidar Myhres
Vokalismen i iddemålet.
Ernst Håkon Jahr og Magne Aasbrenn skriv om ordet "skjælke"
som overlevde i bruk i Onsøy frå vikingtida og fram til vår tid utan at
det var registrert skriftleg nokon stad.
Eldbjørg Skaug
frå Eidsberg skriv om innsamlinga av
dialektord til boka "Essbærliv" - og om roser.
Øyvind Bremer Karlsen, forfattar frå Askim, har ei novelle
om ein gut som lengtar bort frå skolestua og til heilt andre ting.
Gerard Doetjes som arbeider ved
Fremmedspråksenteret i Halden, skriv om situasjonen for
framandspråk i skolen, og også om kor lett det er å lære seg tysk.
Ragnhild Lier,
lektor ved Greåker vidaregåande skole,
skriv ein skarpstilt polemikk om at det ser ut til at engelsk skal
ta over for norsk i skoleverket.
Stefan Andreas Sture, lærar på
Kalnes vidaregåande skole, skriv ein lengre artikkel om
forfattarskapen til Olav H. Hauge.
Morten Skauen Sørmo,
lektor ved Frederik II, skriv om det pedagogisketiltaket
"Nynorskmeisteren", eit populært tiltak som inneber open kappestrid
mellom elevane om kven som er best i nynorsk.
Hild Haaheim frå Fredrikstad har eit essay om ei reise med
Bastøyferja.
|
